My Heart Was Ance.
By Robert Burns
Tune - "To the weavers gin ye go."
I.
My heart was ance as blythe and free
As simmer days were lang,
But a bonnie, westlin weaver lad
Has gart me change my sang.
To the weavers gin ye go, fair maids,
To the weavers gin ye go;
I rede you right gang ne'er at night,
To the weavers gin ye go.
II.
My mither sent me to the town,
To warp a plaiden wab;
But the weary, weary warpin o't
Has gart me sigh and sab.
III.
A bonnie westlin weaver lad,
Sat working at his loom;
He took my heart as wi' a net,
In every knot and thrum.
IV.
I sat beside my warpin-wheel,
And ay I ca'd it roun';
But every shot and every knock,
My heart it gae a stoun.
V.
The moon was sinking in the west
Wi' visage pale and wan,
As my bonnie westlin weaver lad
Convoy'd me thro' the glen.
VI.
But what was said, or what was done,
Shame fa' me gin I tell;
But, oh! I fear the kintra soon
Will ken as weel's mysel.
To the weavers gin ye go, fair maids,
To the weavers gin ye go;
I rede you right gang ne'er at night,
To the weavers gin ye go.