Cassillis' Banks.
By Robert Burns
I.
Now bank an' brae are claith'd in green,
An' scattered cowslips sweetly spring;
By Girvan's fairy-haunted stream,
The birdies flit on wanton wing.
To Cassillis' banks when e'ening fa's,
There wi' my Mary let me flee,
There catch her ilka glance of love,
The bonnie blink o' Mary's e'e!
II.
The chield wha boasts o' warld's walth
Is aften laird o' meikle care;
But Mary she is a' my ain
Ah! fortune canna gie me mair.
Then let me range by Cassillis' banks,
Wi' her, the lassie dear to me,
And catch her ilka glance o' love,
The bonnie blink o' Mary's e'e!