Bonnie Peggy Alison.
By Robert Burns
Tune - "Braes o' Balquihidder."
Chorus.
I'll kiss thee yet, yet,
An' I'll kiss thee o'er again;
An' I'll kiss thee yet, yet,
My bonnie Peggy Alison!
I.
Ilk care and fear, when thou art near,
I ever mair defy them, O;
Young kings upon their hansel throne
Are no sae blest as I am, O!
II.
When in my arms, wi' a' thy charms,
I clasp my countless treasure, O,
I seek nae mair o' Heaven to share
Than sic a moment's pleasure, O!
III.
And by thy een, sae bonnie blue,
I swear, I'm thine for ever, O!
And on thy lips I seal my vow,
And break it shall I never, O!
I'll kiss thee yet, yet,
An' I'll kiss thee o'er again;
An' I'll kiss thee yet, yet,
My bonnie Peggy Alison!