O Steer Her Up.
By Robert Burns
Tune - "O steer her up, and haud her gaun."
I.
O steer her up and haud her gaun -
Her mother's at the mill, jo;
And gin she winna take a man,
E'en let her take her will, jo:
First shore her wi' a kindly kiss,
And ca' another gill, jo,
And gin she take the thing amiss,
E'en let her flyte her fill, jo.
II.
O steer her up, and be na blate,
An' gin she take it ill, jo,
Then lea'e the lassie till her fate,
And time nae longer spill, jo:
Ne'er break your heart for ae rebute,
But think upon it still, jo,
That gin the lassie winna do't,
Ye'll fin' anither will, jo.