Dainty Davie.
By Robert Burns
I.
Now rosy May comes in wi' flowers,
To deck her gay, green-spreading bowers;
And now comes in my happy hours,
To wander wi' my Davie.
Meet me on the warlock knowe,
Dainty Davie, dainty Davie,
There I'll spend the day wi' you,
My ain dear dainty Davie.
II.
The crystal waters round us fa',
The merry birds are lovers a',
The scented breezes round us blaw,
A wandering wi' my Davie.
III.
When purple morning starts the hare,
To steal upon her early fare,
Then thro' the dews I will repair,
To meet my faithfu' Davie
IV.
When day, expiring in the west,
The curtain draws o' nature's rest,
I flee to his arms I lo'e best,
And that's my ain dear Davie.
Meet me on the warlock knowe,
Bonnie Davie, dainty Davie,
There I'll spend the day wi' you,
My ain dear dainty Davie.